İqlim dəyişmələri təsirlərinə uyğunlaşma tədbirləri üzrə mümkün əməkdaşlıq yolları müzakirə olunub

Misirin Şarm əl-Şeyx şəhərində keçirilən İqlim Dəyişmələri üzrə Çərçivə Konvensiyasının 27-ci Tərəflər Konfransı çərçivəsində dünya liderlərinin Sammitinin açılışı olub.

“Həyata keçirmədə birlikdə” devizi altında keçirilən Sammitdə dünyanın 100-dən artıq dövlət və hökumət başçıları iştirak edir.

Əsas müzakirə mövzusu iqlim dəyişmələri üzrə həyata keçirilən proseslər zamanı əldə edilən nəticələrdir.

Ekologiya və Təbii Sərvətlər Nazirliyinin mətbuat xidmətindən bildiriblər ki, Azərbaycanın nümayəndə heyəti plenar iclaslarda iştirakla yanaşı, ikitərəfli görüşlər keçirir.

Bunlardan Tərəflər Konfransına ev sahibliyi edən Misirin ətraf mühit naziri ilə görüş, eyni zamanda, Birləşmiş Millətlər Təşkilatının İnkişaf Proqramının Misir üzrə koordinatoru, ölkəmizdə həyata keçirilən bir çox ekoloji layihələr və təşəbbüslər üzrə tərəfdaşımız olan Alessandro Frakassetti ilə görüşləri qeyd etmək olar.

Yaşıl İqlim Fondu rəhbərliyini təmsil edən Henri Qonsaleslə görüşdə iqlim dəyişmələrinin iqlim sisteminə təsirlərinin yumşaldılması və iqlim dəyişmələri təsirlərinə uyğunlaşma tədbirləri üzrə mümkün əməkdaşlıq yolları müzakirə edilib.

Azərbaycan tərəfi növbəti dəfə regional əməkdaşlığa açıq və hazır olduğunu bildirərək ekoloji problemlərin həlli üçün regional platformanın yaradılmasının vacibliyini bildirib.

İqlim Dəyişmələri üzrə Hökumətlərarası Ekspert Qrupunun (İPCC) rəhbərliyi ilə görüş zamanı digər məsələlərlə yanaşı, konvensiyanın elmi orqanı olan təşkilatın (İPCC) aparıcı müəllif-alimlərin iştirakı ilə iqlim dəyişmələri üzrə regional tədbirin 2023-cü ildə Azərbaycanda keçirilməsi məsələsi müzakirə edilib.