DİM: Birinci qrup üzrə qəbul imtahanlarında 2914 nəfər 500 baldan yuxarı nəticə göstərib
Bu il ali məktəblərə keçirilən qəbul imtahanlarında birinci ixtisas qrupunun RK altqrupunda 1469, Rİ altqrupunda isə 1445 nəfər olmaqla (Azərbaycan və rus bölməsi üzrə) 2914 nəfər 500-dən yuxarı bal toplayıb.
Bu barədə Dövlət İmtahan Mərkəzindən məlumat verilib. Bildirilib ki, bu il I qrup üzrə müsabiqəyə (həm dövlət sifarişi əsasında, həm də ödənişli əsaslarla qəbul aparılan yerlər üzrə) ümumi balı 200-dən, imtahanın ikinci mərhələsi üzrə balı 100-dən az olmayan abituriyentlər buraxılırlar.
Xatırladaq ki, ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi davam edir. İxtisas seçimi bütün qruplar üzrə avqustun 28-i saat 23:59-dək internet vasitəsilə aparılır. İxtisas seçmək hüququ olan abituriyentlər (o cümlədən subbakalavrlar) müsabiqə şərtini ödədikləri ixtisas qrupuna (qruplarına), o cümlədən altqrupuna (altqruplarına) aid olan 15-dək ixtisasın kodunu qeyd edə bilərlər.
