Böyük Qafqazın yüksək dağlıq ərazilərində qar yağıb
Milli Hidrometeorologiya Xidmətinin sentyabrın 10-da saat 11:00-a olan məlumatına əsasən, ölkə ərazisində qeyri-sabit hava şəraiti davam edib, bəzi yerlərdə şimşək çaxıb, arabir leysan xarakterli yağış yağıb. Bəzi yerlərdə yağıntılar intensiv olub.
Xidmətdən bildiriblər ki, Böyük Qafqazın yüksək dağlıq ərazilərində qar yağması müşahidə olunub.
Düşən yağıntının miqdarı Qaxda 17 millimetr, Qubada 15 millimetr, Qusarda 14 millimetr, Kürdəmir, Oğuzda 10 millimetr, Qobustan, Gədəbəydə 9 millimetr, Daşkəsən, Ağdam, Şamaxı, Göygöl, Tərtər, Zərdab, Qəbələ, Göyçay, Şabran, Astara, Naftalan, Zaqatala, Şəmkir, Ordubad, Yevlax, Bərdə, Beyləqan, Şahbuz, Naxçıvan, Sədərək, Balakən, Mingəçevir, İmişli, Salyan, Sabirabad, Biçənək, Gəncə, İsmayıllı, Altıağac, Xaltan, Şahdağ, Cəfərxan, Biləsuvar, Yardımlı, Lənkəranda 8 millimetrədək, Bakıda və Abşeron yarımadasında isə 3 millimetrədək olub.
Qərb küləyi arabir Zaqatalada (Əlibəydə) 34-40 m/s, Naftalanda 24 m/s, Göyçay, Ağdamda 22 m/s, Mingəçevirdə 21 m/s, Şəki, Şahdağda 20 m/s, Bərdə, Naxçıvan, Goranboy, Tərtərdə 18 m/s, Bakıda və Abşeron yarımadasında 25-28 m/s-dək güclənib.
Neft Daşları stansiyasının məlumatına əsasən dalğanın hündürlüyü 2,8 metrə çatıb.
