Bakı-Tbilisi-Bakı marşrutu üzrə biletləri bir ay əvvəl daha sərfəli qiymətə almaq mümkün olacaq
Bakı-Tbilisi-Bakı marşrutu üzrə ümumi hərəkət müddəti təxminən 9 saat 30 dəqiqədir. Bunun təxminən 1 saatı Azərbaycan və 1 saatı Gürcüstan sərhədində gömrük və sərhəd yoxlamalarına sərf olunur.
Bu sözləri Azərbaycan Dəmir Yolları (ADY) QSC-nin İctimaiyyətlə əlaqələr şöbəsinin müdiri Bəxtiyar Hacıyev söyləyib.
O qeyd edib ki, ilkin reyslər 6 vaqondan ibarət olacaq. Bunlardan biri restoran vaqonudur. Digər vaqonlar isə “Komfort", “Komfort+” və "Lüks" siniflərə aiddir. Qatarın ümumi sərnişin tutumu 118 nəfərlikdir.
İlk reys mayın 25-də Bakıdan yola düşəcək və növbəti gün saat 08:41-də Tbilisiyə çatacaq. Eyni zamanda, Tbilisidən hər gün saat 21:00-da hərəkət edən qatar Bakı şəhərinə saat 06:24-də çatacaq.
“Qatarda dinamik qiymət siyasəti tətbiq olunur. Bu sistemə əsasən, sərnişinlər biletləri 25-30 gün əvvəl aldıqda daha sərfəli qiymətlərdən yararlana bilirlər. Bu yanaşma həm sərnişinlərin planlaşdırmasını asanlaşdırır, həm də daşınma planlamasını daha effektiv edir”, - deyə B. Hacıyev vurğulayıb.//Azərtac
