“AzerGold” QSC iqlim dəyişikliyi mövzusunda növbəti təlim keçirib
İyunun 19-20-də “AzerGold” QSC-nin Korporativ Sosial Məsuliyyət Komitəsi Heydər Əliyev Fondunun “Regional İnkişaf” İctimai Birliyi ilə tərəfdaşlıq çərçivəsində Naxçıvan şəhərində “Fərdi aqrar təsərrüfatların iqlim dəyişikliyinə adaptasiyası” mövzusunda təlim təşkil edib.
QSC-dən bildirilib ki, tədbirdə çıxış edən Naxçıvan Muxtar Respublikasının İqtisadiyyat naziri Tapdıq Əliyev, “AzerGold” QSC-nin idarə heyətinin sədri Zakir İbrahimov, Naxçıvan Muxtar Respublikasının Ekologiya və Təbii Sərvətlər naziri Mayis Əliyev, Heydər Əliyev Fondunun Beynəlxalq Əlaqələr Departamentinin rəhbəri Soltan Məmmədov, Kiçik və Orta Biznesin İnkişafı Agentliyinin idarə heyətinin sədr müavini Nadir Adilov, Milli Hidrometeorologiya xidmətinin direktor müavini İmran Əbdulov iqlim dəyişikliyinin təsirləri ilə mübarizə istiqamətində ölkədə görülən tədbirlər haqqında tədbir iştirakçılarına ətraflı məlumat verib, dövlətlə yanaşı, hər bir özəl müəssisənin də bu istiqamətdə daha fəal olmasının önəmini vurğulayıblar.
İkigünlük tədbir zamanı Naxçıvan Muxtar Respublikasının müxtəlif bölgələrində heyvandarlıq və bitkiçilik sahəsində fəaliyyət göstərən 60-dan çox sahibkar iqlim dəyişikliyi şəraitində su, torpaq və bitki idarəçiliyi, kənd təsərrüfatında mövcud innovasiyalar, iqlim dəyişikliyinə məruz qalan təsərrüfatlara qanunvericilikdə nəzərdə tutulan güzəştlər haqqında praktik biliklər əldə ediblər. Bundan əlavə, sahibkarları maraqlandıran suallar Ekologiya və Təbii Sərvətlər, Kənd Təsərrüfatı nazirliklərinin, elm və təhsil ocaqlarının ixtisaslaşmış mütəxəssisləri tərəfindən cavablandırılıb. Geniş müzakirələrin və fikir mübadiləsinin aparıldığı təlimin sonunda sahibkarlar müvafiq sertifikatlarla təltif olunublar.
Qeyd edilib ki, bu ilin aprelində Bakıda Gəncə-Qazax, Aran və Lənkəran iqtisadi rayonlarında kənd təsərrüfatı sahəsində fəaliyyət göstərən 50-dək sahibkara iqlim dəyişikliyi mövzusunda 4 günlük təlim təşkil edilib. Rəsmi dövlət qurumlarının, elm və təhsil ocaqlarının, müstəqil ekspertlərin təlimçi qismində iştirak etdiyi bu təlimlər əməkqabiliyyətli əhalinin böyük hissəsinin məşğul olduğu kənd təsərrüfatının iqlim dəyişikliyinə adaptasiyasına, qeyri-neft sektorunun dayanıqlı inkişafına, regionlarda sosial rifahın daha da yüksəlməsinə dəstək göstərmək və bununla da “Dayanıqlı İnkişaf üzrə Qlobal Hədəflər 2030”a nail olunmasına töhfə vermək məqsədlərini daşıyır.
Xatırladaq ki, Azərbaycan Respublikası Birləşmiş Millətlər Təşkilatının İqlim Dəyişmələri üzrə Paris Sazişinə 2016-cı il oktyabrın 26-dan etibarən qoşulub və bu istiqamətdə ölkəmizdə silsilə tədbirlər həyata keçirilir.
