Dəmirli mis mədənində hasilata başlanılıb
Azərbaycanın Dəmirli mis mədənində hasilata başlanılıb.
Yerveinsan.az bildirir ki, bu barədə Trend "Anglo Asian Mining"ə istinadən xəbər verir.
“Anglo Asian Mining”in baş direktoru Reza Vəziri bildirib ki, Dəmirli mis mədənində hasilatın başlanılması şirkətin Azərbaycana fokuslanmış orta səviyyəli çoxprofilli dağ-mədən şirkətinə çevrilməsi istiqamətində atılmış mühüm addımdır.
“Şirkətimiz Azərbaycanın dağ-mədən sənayesində pioner olub və ölkənin hasilat sənayesinin inkişafı və böyüməsində hökumətə dəstək göstərməkdə davam edir. Xüsusilə Dəmirli Qarabağ iqtisadi rayonunun dirçəlişinə töhfə verəcək”, – deyə o bildirib.
Vəziri vurğulayıb ki, “Anglo Asian Mining” bu il Dəmirli mədənində hasilatın təxminən 4 000 ton misə çatacağını gözləyir ki, bu da 2025-ci ildə şirkətin ümumi mis istehsalının əhəmiyyətli dərəcədə artmasına səbəb olacaq.
Mədən və zənginləşdirmə fabriki üçün təxminən 150 yeni ştat işçisi işə götürülüb, əlavə olaraq 50-yə yaxın təcrübəli əməkdaş istehsalatın fasiləsiz işə düşməsini təmin etmək məqsədilə şirkətin digər obyektlərindən köçürülüb. Ərazidə texniki və inzibati komandaların rəhbərliyi altında müxtəlif podratçı təşkilatlar fəaliyyət göstərir.
