Kitabxanada 2026-cı ilin yubilyarlarına həsr olunmuş kitab sərgiləri təşkil olundu
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasında “Yubileylər silsiləsi” layihəsi çərçivəsində 2026-cı ildə yubileyləri olan alim, şair və yazıçılara həsr olunmuş kitab sərgiləri təşkil olundu. Kitab sərgilərində oxuculara yubilyarların ən məşhur əsərləri, onların həyat və yaradıcılığına həsr olunmuş əsərlər və tədqiqat işləri təqdim edilir. Sərgilərdə yubilyarların Azərbaycan Respublikası Prezidentinin sərəncamları ilə nəşr olunmuş kitabları da nümayiş olunur.
Bundan başqa, sərgilərdə oxuculara alim, yazıçı və şairlər haqqında ensiklopediyalar və ensiklopedik məlumatlar da təqdim edilir.
Görkəmli alim, filosof, astronom, riyaziyyatçı, tarixçi, coğrafiyaşünas N.Tusinin 825 illiyinə həsr olunmuş “Nəsirəddin Tusi – 825” sərgisində alimin “Əxlaqi-Nasiri”, “Tozlu lövhənin köməyi ilə hesab toplusu” əsərləri, H.Məmmədbəylinin “Mühəmməd Nəsirəddin Tusi”, S.Əhmədovun “Azərbaycan tarixindən yüz şəxsiyyət”, görkəmli tarixçi-alim Sara Aşurbəylinin 120 illik yubileyinə həsr olunmuş “Sara Aşurbəyli – 120” sərgisində alimin “Bakı şəhərinin tarixi”, “История города Баку”, S.Gəncəlinin “Qadın, gözəllik və ülviyyət” kitabı, yazıçı, ədəbiyyatşünas, ictimai xadim, filologiya elmləri doktoru, professor Əzizə Cəfərzadənin 105 illiyinə həsr olunmuş “Əzizə Cəfərzadə – 105” sərgisində onun müəllifi olduğu “Dilbər”, “Eşq sultanı”, “Anamın nağılları”, “Eldən-elə” kitabları nümayiş olunur.
Ən zəngin kitab sərgisi Azərbaycan və dünya ədəbiyyatının görkəmli simalarından biri, yaradıcılığı ilə Azərbaycan şifahi və yazılı söz sənətinin inkişafında mühüm rol oynamış Nizami Gəncəvinin 885 illik yubileyinə həsr olunmuş “Nizami Gəncəvi – 885” sərgisidir. Sərgidə Nizaminin “Xəmsə”si: “Sirlər xəzinəsi”, “Xosrov və Şirin”, “Leyli və Məcnun”, “Yeddi gözəl” və “İsgəndərnamə” əsərləri, Məhəmməd Əmin Rəsulzadənin “Azərbaycan şairi Nizami”, Xəlil Yusiflinin “Nizami Gəncəvi: sələflər və xələflər”, Yevgeni Bertelsin “Böyük Azərbaycan şairi Nizami”, Fərid Hüseynin “Nizami Gəncəvinin əsərlərinin el variantları” və s. kitablar sərgilənir. Görkəmli Azərbaycan şairi, mütəfəkkiri Xaqani Şirvaninin 900 illik yubileyinə həsr olunmuş “Xaqani Şirvani – 900” sərgisində şairin “Seçilmiş əsərləri”, “Lirika”, “Дворцы Мадaина” və s. kitablar, görkəmli saz-söz ustası, dastan qəhrəmanı və sənət məktəbi yaradan Aşıq Ələsgərin 205 illiyinə həsr olunmuş “Aşıq Ələsgər – 205” sərgisində ustadın “Əsərləri”, “Əsərləri, dastanı-rəvayətlər, xatirələr...” kitabları, Azərbaycan şairi, dramaturq, tərcüməçi, ictimai xadim Süleyman Rüstəmin 120 illik yubileyi ilə əlaqədar “Süleyman Rüstəm – 120” sərgisində şairin 5 cilddə “Seçilmiş əsərləri”, “Əsərləri”, Azərbaycan şairi, dramaturq, tərcüməçi, ədəbiyyatşünas, Azərbaycanın ilk Xalq şairi Səməd Vurğunun 120 illiyinə həsr olunmuş “Səməd Vurğun – 120” sərgisində şairin 5 cilddə olan “Seçilmiş əsərləri”, Adilxan Bayramovun “Səməd Vurğun: milli və ümumbəşəri”, “Səməd Vurğun: seçilmiş əsərləri”, Azərbaycan yazıçısı, dramaturq, publisist, pedaqoq, ədəbiyyatşünas, tərcüməçi Abdulla Şaiqin 145 illiyinə həsr olunmuş “Abdulla Şaiq – 145” sərgisində onun “Seçilmiş əsərlər”i, “Tıq-tıq xanım”, “Tülkü həccə gedir”, “Yaxşı arxa” və s., nasir, tərcüməçi, ssenari müəllifi Ələviyyə Babayevanın 105 illiyinə həsr olunmuş “Ələviyyə Babayeva – 105” sərgisində “Anadil ağlayırdı”, “Səni axtarıram”, “Seçilmiş əsərləri”, şair Mədinə Gülgünun 100 illik yubileyinə həsr olunmuş “Mədinə Gülgün – 100” sərgisində “Yora bilməz yollar məni”, “Seçilmiş əsərləri” və s. kitablar, Xalq şairi Qabilin 100 illik yubileyinə həsr olunmuş “Qabil – 100” şairin “Seçilmiş əsərləri”, “Ömür həbləri”, “Nəsimi” və s. kitabları nümayiş olunur.
“Qrimm qardaşları – 240” sərgisində nağılçı qardaşların “Золотой гусь”, “Бременские музыканты”, “Три пряхи” və s., elmi-fantastik ədəbiyyatın ən tanınmış simalarından biri Herbert Uellsin 160 illiyinə həsr olunmuş “Herbert Uells – 160” sərgisində fantastın “Seçilmiş əsərləri”, “Zaman maşını”, “Dünyaların müharibəsi” və s., dünya şöhrətli Amerika yazıçısı, ictimai xadim Teodor Drayzerin 155 illiyinə həsr olunmuş “Teodor Drayzer – 155” sərgisində “Cenni Herhardt”, “Финансист”, “Гений” və s., Amerika yazıçısı, daha çox sərgüzəştlərlə dolu hekayə və romanların müəllifi olan Cek Londonun 150 illik yubileyi ilə ilə əlaqədar “Cek London – 150” sərgisində “Seçilmiş əsərləri”, “Martin İden”, “Ağ Diş” və s. kitablar nümayiş olunur. Tanınmış uşaq yazıçısı, şair, professor, M.Ş.Vazeh adına Mərkəzi Kitabxananın Fəxri oxucusu Solmaz Amanovanın 70 illiyinə həsr olunmuş “Solmaz Amanova – 70” sərgisində “Şuşanın sehirli açarları”, “Əlifba”, “Əlifba 2”, “Xurcun”, “Cəsur ayı və dostları”, “Gəncə haqqında hekayə”, “İlmənin macəraları”, “Мой волшебный мир”, “Волшебные ключи города: Шуша”, “Turac və sehrli daraq”, kitabları nümayiş olunur.
Kitab sərgiləri kitabxanada 2026-cı il ərzində oxuculara nümayiş olunacaq.
