Salam , əziz qardaşım.Necəsən?Anamız necədır? Anam üçün darıxdığımı  səndən gizlətməyəcəyəm.Təskinliyim odur ki, Vətənim də anamdır və mən Vətənimin ,anamın keşiyində ayıq-sayıq dayanıram və qoruyuram. Qardaş, artıq Dövlət Sərhəd Xidmətinin zabitiyəm.Çiynimdə gəzdirdiyim 2 kiçik səkkizgüşəli ulduzun məsuliyyəti olduqca  böyükdür. Həm də daşıdığım ikiqat məsuliyyət ön mövqedə   əsgər bölməsinin  komandiri olmağımla bağlıdır.Burda  Azərbaycanın bir çox bölgələrindən əsgərlər xidmət edir.Biz bir ailə kimi ön mövqedə dövlət sərhədinin mühafizəsindəyik və Vətənimiz qarşısında müqəddəs borcumuzu şərəflə yerinə yetiririk.Bu möbqeyə  təyin olunan gündən etibarən əsgərlərlə döyüş və mənəvi -psixoloji hazırllıq üzrə təlimlər və dərslər keçirəm.Axı əsgərin  yüksək  hərbi bilikləri və bacarıqları bilavasitə döyüşdə uğur və qələbə deməkdir.Mən Dövlət Sərhəd Akademiyasında qazandığım bilıkləri hər cəhətdən tağımın daima döyüş vəziyyətinin yüksəldilməsinə sərf edirəm.Dərs və təlim məşğələləri  keçdikcə hər bir əsgərin gözündə düşmənə qarşı böyük nifrət qığılcımı və qəzəb alovu  görürəm. Bizim yüksək səviyyədə xidməti fəaliyyətimiz üçün  rəhbərlik yetərincə   lazımi şərait yaradıb. Tabeliyimdə olan əsgərlər  şəhid qanı ilə suvarılmış düşmən tapdağı altında  olan  torpaqlarımızdan boy atan   bağrıqan lalələrin həsrətinə son qoymaq üçün  tezliklə silaha  sarılaraq döyüşə atılmaq və  mənfur düşməndən qisas almaq arzusundadırlar.Mən də hər zaman təlimlərimdə onların  bu hislərlə yaşadığını duyduğum üçün   onlara tezliklə bu istəyimizə nail olacağımıza əminliyimi  hiss etdirir və düşmənlə barışmazlıq duyğusunu aşılayıram.
    Əziz qardaşim, ön mövqedə xidmət etməyə başladıqda bir daha əmin oldum  ki, əsl kişilik məktəbi məhz  buradir.Ön mövqedə xidmət edən hər bir zabit ,hər bir əsgər    Vətənimizi tezliklə erməni qəsbkarlarından təmizləmək və  işğal olunmuş  müqəddəs torpaqlarımızı azad etmək arzusu ilə yaşayır .Yüksək çinli zabitlərimiz, başda DSX-nin rəisi olmaqla, demək olar ki,hər gün yanımızdadırlar.Komandanlıq bizə güvənir.Biz də hər cəhətdən onlara güvənir və arxalanırıq.
    Tağımımda bir əsgər var.Onun atası  Qarabağ müharibəsində şəhid olub.O, tez-tez mövqeyimizdən aydın  görünən əzəli torpaqlarımıza baxanda, mən onun aydın oxunan üz   çizgilərindən qisas hissi ilə alışıb yandığını  görür və  oxuyuram..Atasi şəhid olanda o , balaca imiş.Atasının döyüş yoldaşları tez-tez onun ailəsinə baş çəkib  və atasının necə qəhrəmanlıq göstərməsi haqqinda ona danişiblar.Bu gün o, onu ata nəvazişində məhrum edən erməni şovenistlərindən atasının qısasını almaq niyyətində,gücündə və   iqtidarındadır və  bu hislərlə də  yaşayır.Və həmişə deyir ki,istəmirəm,məmləkətimdə bir uşaq da ata,ana qayğısından kənar yaşasın, mənimtək vətən torpaqlarına həsrətlə boylansın.
 Qardaş, biz tez-tez  hərbi təlimlərə cəlb edilirik.Bu təlimlərdə bütün silahlardan sərrast atəş açmağı və düşmənə qarşı  müxtəlif növ   döyüş  üsullarını öyrənirik.Sən bilirsənmi ki,  bu təlimlər necə  də maraqlı keçir? Komandirlərimiz bizə hərbi bilik verərək döyüşün müxtəlif şəraıtlərdə necə  aparılmasını öyrədirlər.Artıq ordumuz güclənib və modernləşib.Səni  qeyd-şərtsiz əmin edirəm ki,əgər döyüşlər başlasa, biz mütləq qalib gələcəyik!  Biz hər an Cənab Prezident Silahlı Qüvvələrin Ali Baş Komandanı İlham Əliyevin əmrini gözləyirik və bu amalla da  yaşayırıq.Əminik  ki,erməni daşnaklarının  xain və fitnəkar əməllərinə  layiqincə cavab verəcəyik.
Mənim məktəbli  qardaşım ,çalış ki, sən də əsgərliyə çağırılanadək məktəbdə hərbi hazırlıq dərslərində hərb elminin incəliklərini öyrənəsən.Çünki sən bu dediklərimi əsgərliyə gəlməzdən öncə öyrənsən, sənə xidmət etmək  çox rahat olacaq.
    Məktubumun sonunda sənə bir ismaricim var: Hər an Vətəni sev və Vətən uğrunda yaşamağa,hətta lazım gəlsə, ölməyə hazır ol və  bu amalla  yaşa…
     Vətən müqəddəsdir. Vətən       varlığımızdır, kimliyimizdir, keçmişimiz, bu günümüz, gələcəyimizdir . “Kitabi-Dədə Qorqud” dastanında deyildiyi kimi: ”Vətəni qorumasan,əkib-becərməyə dəyməz.Əkib –becərməsən,qorumağa dəyməz.”Vətənimizi hər qarış torpağı müqəddəs and yerimiz,Məkkəmiz,Mədinəmiz,qibləgahımızdır.Unutma,mükəmməl bilik və bacarığa malik olub dövlətimizin iqtisadiyyatını inkişaf etdirmək,yüksək tribunalardan zəngin  tarixi keçmişə malik ölkəmizi  siyasi xadim kimi təmsil etmək,hərbi biliklərə  mükəmməl yiyələnib  vətənin keşiyində  dayanmaq sənin də ,mənim də,  torpaqlarının 20 faizi işğalda inləyən Qarabağ nisgilli  bütün  Azərbaycan xalqının  müqəddəs məqsədi,amalı və vəzifə borcudur! Canımızı ,fiziki varlığımızı bizə  ALLAH əta etsə də,bir millət,bir xalq olaraq mənəvi varlığımızı Vətən bəxş edib!  Biz  bu torpagın  havasın udub suyunu içmişik.Üstündə ayaq tutub gəzmişik.Vətən torpağından yoğrulmuşuq . Hər birimiz bir ovuc vətən torpağı,vətən daşıyıq.Elə yaşamalı,vətənin müdafiəsi keşiyində elə dayanmalıyıq ki, vətənləşə,vətəndaşlaşa bilək! Dediklərimi unutma! Yaşından,mövqeyindən,vəzifəndən asılı olmayaraq çalış ki, hər zaman Vətənə layıqli əsgər olasan!

Mən sərhədlərimizi mühafizə etməyimlə qürur duyuram.

  Anamdan müğayət ol,qardaş, necə ki mən və Vətənsevər dostlarım  bu an və hər an ana Vətənimizi ,anamızı qorumaq üçün ön mövqedə  ayıq-sayıqıq,sən də bizdən həyat dərsi al. Davamçımız ol. Anamı və özünü qoru, mənim üçün ,Vətən üçün!  

          Öpürəm səni,mənim  sənin zabit qardaşın.

Ehtiyatda olan polkovnik –leytenant Mürsəl Qurbanov

-