Müəllimlərin işə qəbulu üzrə müsabiqənin test imtahanı mərhələsi başa çatıb
2026–2027-ci tədris ili üçün müəllimlərin işə qəbulu üzrə müsabiqənin test imtahanı mərhələsi uğurla başa çatıb, 4 nəfər namizəd imtahandan kənarlaşdırılıb.
Məktəbəqədər və Ümumi Təhsil üzrə Dövlət Agentliyinin məlumatına əsasən, 14–18 iyul tarixlərində təşkil olunan test imtahanlarına ümumilikdə 32222 namizəd dəvət olunub. Test imtahanı mərhələsi üzrə davamiyyət göstəricisi 96% təşkil edib.
"Test imtahanının son günü üzrə apellyasiya müraciətlərinin qəbulu 19 iyul saat 12:00-dan etibarən başlayacaq", - mətbuat xidmətinin məlumatında bildirilib.
Məlumata görə, test imtahanı mərhələsi zamanı qaydaları pozduqları müəyyən edilən 4 nəfər namizəd imtahandan kənarlaşdırılıb. İmtahan prosesinin şəffaflığının və obyektivliyinin təmin edilməsi məqsədilə nəzarət tədbirləri bütün imtahan mərkəzlərində davam etdirilib.
Müsabiqənin növbəti mərhələsi barədə məlumat yaxın günlərdə ictimaiyyətə açıqlanacaq.
