Şahin Mustafayev: Azərbaycan–Rusiya əməkdaşlığında əsas istiqamət nəqliyyat-logistikadır
Bu gün Azərbaycan ilə Rusiya arasında bütün sahələr üzrə əməkdaşlıq imkanlarının təhlil etdik və tərəflərin geniş potensialının mövcudluğu ilə bağlı ortaq mövqedə olduğumuz müəyyənləşdi.
Bu barədə jurnalistlərə açıqlaması zamanı Azərbaycan Baş nazirinin müavini Şahin Mustafayev deyib.
Baş nazirin müavininin sözlərinə görə, əməkdaşlığın daha da genişləndirilməsi üçün bütün imkanlar nəzərdən keçirilib, Rusiya şirkətləri ilə sıx əməkdaşlığın davam etdirilməsinə qərar verilib.
“Ölkəmizlə Rusiya arasında bütün sahələri təhlil etdik, potensialı üzə çıxardıq və hər iki tərəfin fikrincə, əməkdaşlığın genişləndirilməsi üçün geniş imkanlar var. Biz bu imkanlardan istifadə edəcəyik. Rusiya şirkətləri müxtəlif sahələrdə əməkdaşlığa dəvət olunub və Azərbaycanın yaratdığı imkanlar barədə məlumatlandırılıb. Sabah Bakı şəhərində keçiriləcək Azərbaycan–Rusiya İşgüzar Şurasının iclasında sahibkarlıq subyektlərinin iştirakı ilə təqdimatlar olacaq, Azərbaycanda yaradılan imkanlar geniş şəkildə təqdim ediləcək və biznes dairələri əməkdaşlığa dəvət olunacaq”, – deyə o qeyd edib.
Şahin Mustafayev Azərbaycan–Rusiya əməkdaşlığında əsas istiqamətlərdən birinin nəqliyyat-logistika sahəsi olduğunu vurğulayıb. Onun sözlərinə görə, Azərbaycan həm “Şimal–Cənub”, həm də “Şərq–Qərb” nəqliyyat dəhlizlərinin kəsişməsində yerləşir: “Bu gün biz “Şimal–Cənub” nəqliyyat dəhlizinin yeni həlqəsi hesab etdiyimiz Ağbənd körpüsünün və sərhəd-keçid məntəqəsinin yerləşdiyi ərazidəyik. Rusiya tərəfi də bu infrastrukturla tanış olub. Ağbənd körpüsü Şimaldan Cənuba – Rusiyanın şimalından Azərbaycan və İran üzərindən Körfəzə yükdaşımalar üçün strateji əhəmiyyət daşıyır. Həmçinin Azərbaycan–İran–Naxçıvan–Türkiyə istiqamətində bağlantı yaradır. Bu, böyük potensial deməkdir və Rusiya nümayəndə heyətinin bu sahəyə marağı mühüm göstəricidir”.
Şahin Mustafayev qeyd edib ki, İran ərazisində Azərbaycan terminalı vasitəsilə daşımalar həyata keçirilir və regiondakı vəziyyətə baxmayaraq, “Şimal–Cənub” dəhlizi fəaliyyətini davam etdirib ki, bu da dəhlizin dayanıqlığını və etibarlılığını göstərib.
Həmçinin Baş nazirin müavini Ermənistan istiqamətində tranzit daşımalar üçün Azərbaycan ərazisindən istifadə imkanlarının yaradıldığını xatırladıb və bunun regional əməkdaşlıq üçün mühüm addım olduğunu vurğulayıb.
“Bu qərardan sonra təxminən 26 min ton yük Azərbaycan ərazisindən daşınıb”, – deyə Ş.Mustafayev əlavə edib.
Baş nazirin müavini Ağbənd körpüsü və sərhəd-keçid məntəqəsinin qısa müddətdə tam istifadəyə veriləcəyinə əminliyini ifadə edib.//Azərtac
