Tramp Qrenlandiya razılaşmasının “müddətsiz” olduğunu və “istədikləri hər şeyi edə biləcəklərini” bildirib

ABŞ Prezidenti Donald Tramp NATO ilə əldə etdikləri Qrenlandiya üzrə çərçivə razılaşması sayəsində ada ilə bağlı istədikləri hər şeyi edə biləcəklərini və bu razılaşmanın “müddətsiz” olduğunu deyib.

ABŞ Prezidenti Tramp Davosda keçirilən 56-cı Dünya İqtisadi Forumu (WEF) toplantılarından sonra Vaşinqtona qayıdarkən təyyarədə jurnalistlərə səfərini dəyərləndirib.

Xüsusilə Qrenlandiya mövzusunda həm NATO, həm də Avropa liderləri ilə çox müsbət görüşlər apardıqlarını bildirən Tramp bu məsələ ilə bağlı istədikləri hər şeyi aldıqlarını iddia edib.

Tramp NATO ilə əldə edilən çərçivə razılaşması barədə deyib:
“Bunu həqiqətən də bir danışıqlar prosesi adlandıra bilərik, amma bu razılaşma müddətsizdir, yəni zaman məhdudiyyəti yoxdur. 99 il və ya 50 il deyil, əbədi olaraq davam edir. (Qrenlandiya ilə bağlı) istədiyimiz hər şeyi edə bilərik, hərbi məsələlər də daxil olmaqla.”

Qrenlandiyada ABŞ-nin hansı fəaliyyətləri həyata keçirəcəyi mövzusunda NATO ilə əməkdaşlığa toxunan Tramp bildirib:
“Hamımız birlikdə işləyəcəyik və əslində NATO da bizimlə birlikdə olacaq. Bəzi işlər baha başa gələcək, lakin ‘Qızıl Qübbə’ni inşa etməkdən başqa ciddi xərcimiz olmayacaq. Buraya ‘Qızıl Qübbə’ səbəbindən gələcəyik.”

Tramp Danimarkanın bu prosesə necə yanaşdığı ilə bağlı suala isə belə cavab verib:
“Əslində hamı bunu bəyəndi. (Danimarka məsələsi ilə bağlı) iki həftə ərzində sizə xəbər verərəm.”