ABŞ-ın Venesuelaya hərbi müdaxiləsi Tramp tərəfdarlarını iki yerə böldü
ABŞ-ın Venesuelaya yönəlmiş hərbi müdaxiləsi Prezident Donald Trampın tərəfdarlarının bir hissəsi tərəfindən məmnunluqla qarşılanarkən, bəzi dairələr bu addımı sual altına alır.
The New York Times (NYT) qəzetinin xəbərinə görə, ABŞ-ın Venesueladakı hərbi müdaxiləsi Tramp tərəfdarlarını iki yerə bölüb.
Venesuelaya yönəlmiş hərbi müdaxilə bir çox respublikaçı tərəfindən “qələbə” kimi qiymətləndirilib qeyd olunsa da, “Amerikanı Yenidən Böyük Et” (MAGA) hərəkatının tərəfdarları ilə bəzi respublikaçılar arasında bu müdaxiləyə etiraz edənlər də olub.
Trampın keçmiş müşaviri Stiv Bennon “War Room” adlı podkast proqramında Venesuelaya hərbi əməliyyatın aparılma formasını tərifləyib.
Lakin Bennon bildirib ki, hərbi müdaxilə ilə bağlı aydın mesaj verilməməsi bazanı qəzəbləndirib və çaşqın vəziyyətə salıb.
Bennon, Trampın açıqlamaları ilə yanaşı, dövlət katibi Marko Rubionun HƏMAS və Hizbullaha yönəlmiş açıqlamalarının da “baş qarışdırıcı” olduğunu deyib.
Şərhçi Kendeys Ouvens X sosial media platformasındakı paylaşımında ABŞ Mərkəzi Kəşfiyyat İdarəsinin (CIA) “qlobal psixopatların” əmri ilə “daha bir ölkəyə düşməncəsinə işğal həyata keçirdiyini” bildirib.
Ouvens hərbi müdaxiləni ABŞ-ın Suriya, Əfqanıstan və İraqdakı addımları ilə müqayisə edib.
ABŞ Konqresindəki respublikaçılar arasında da hərbi müdaxiləni tənqid edənlər olub.
ABŞ Nümayəndələr Palatasının respublikaçı üzvü Marjori Teylor Qrin Tramp administrasiyasını ABŞ xalqına xidmət etməməkdə ittiham edib.
Qrin administrasiyanın iri şirkətlərə, banklara və neft şirkətlərinin rəhbərlərinə xidmət etdiyini iddia edib.
Respublikaçı konqresmen Tomas Massi isə administrasiyanın Venesueladakı müdaxiləsinin “narkotiklə mübarizə məqsədi daşımadığını, neft maraqlarını və rejim dəyişikliyini” hədəflədiyini deyib.
Massi “Biz bunun üçün səs vermədik” ifadəsini işlədib.https://www.aa.com.tr/
