Masallıda meşə massivindəki yanğın nəticəsində 500 kvadratmetr sahədə kol-kos və xəzəl yanıb
Fövqəladə Hallar Nazirliyinin (FHN) 112 - qaynar telefon xəttinə Masallı rayonunun Yeyənkənd kəndi ərazisində meşə massivində yanğın baş verməsi barədə məlumat daxil olub.
Nazirliyin mətbuat xidmətindən bildirilib ki, dərhal FHN-in Dövlət Yanğından Mühafizə Xidmətinin qüvvələri çağırış üzrə cəlb olunub.
Hadisə yerində əməliyyat şəraiti qiymətləndirilərkən meşə ərazisində kol-kos və xəzəlin yandığı və alovun meşədəki çoxillik ağaclara keçmə riskinin yüksək olduğu müəyyənləşdirilib.
Yanğınsöndürənlərin operativ müdaxiləsi sayəsində yanğının genişlənməsinə, o cümlədən ağaclara keçməsinə imkan verilmədən qısa müddətdə söndürülüb.
Hadisə nəticəsində təxminən 500 kvadratmetr sahədə kol-kos və xəzəl yanıb, meşə massivi alovdan mühafizə olunub.
