BDYP səfərdən geri qayıdan sürücülərə müraciət edib
Baş Dövlət Yol Polisi İdarəsi (BDYP) səfərdən geri qayıdan sürücülərə müraciət edib.
Bu barədə BDYP-dən məlumat verilib.
Baş Dövlət Yol Polisi İdarəsi sürücülərə tövsiyə edir ki, səfər zamanı mütəmadi fasilələr versinlər, yuxusuz və yorğun halda avtomobil idarə etməsinlər.
“Bayram günlərinin başa çatması ilə əlaqədar bölgələrdən paytaxta və digər istiqamətlərə qayıdan sürücüləri yollarda daha diqqətli olmağa çağırırıq.
Xüsusilə geri dönüş zamanı nəqliyyat axınının intensivləşməsi nəzərə alınmalı, tələskənliyə yol verilməməli, təhlükəli ötmə manevrlərindən çəkinilməlidir.
Uzun məsafəli səfərlərdən qayıdarkən sürücülərin diqqət etməli olduğu əsas məqamlardan biri də yorğunluqdur. Unutmayaq ki, sükan arxasında yorğunluq diqqətin yayınmasına, reaksiya müddətinin uzanmasına və ağır yol-nəqliyyat hadisələrinə səbəb ola bilər.
Unutmayın, əsas məqsəd mənzil başına tez deyil, sağ-salamat çatmaqdır!”,- deyə müraciətdə bildirilir.
