Putin İrəvanda Koçaryanın həyat yoldaşı ilə görüşüb

Rusiya Prezidenti Vladimir Putin Ermənistanın həbsdə olan sabiq prezidenti Robert Koçaryanın həyat yoldaşı Bella Koçaryanla görüşüb.

 "aysor.am”ın verdiyi xəbərə görə, görüş dünən Rusiyanın İrəvandakı səfirliyində baş tutub.


Sabiq prezidentin ofisi və Rusiya səfirliyi görüş barədə şərh verməyiblər.


Qeyd edək ki, V. Putin ötən gün Ali Avrasiya İqtisadi Şurasının İrəvanda keçirilən iclasında iştirak etmək üçün Ermənistana səfər edib.


Xatırladaq ki, 2018-ci il iyulun 26-da Ermənistan İstintaq Xidməti 2008-ci il martın 1-də keçirilmiş aksiyanın dağıdılması ilə əlaqədar başladılmış cinayət işi çərçivəsində R. Koçaryana qarşı konstitusiya quruluşunun pozulmasına dair ittiham irəli sürüb. Bir gün sonra keçmiş prezident həbs olunub. Bu ilin mayında R. Koçaryan Dağlıq Qarabağdakı qondarma rejimin nümayəndələrinin zaminliyi ilə azadlığa buraxılıb. Bundan sonra Ermənistanın Apelyasiya Məhkəməsi keçmiş prezident R. Koçaryanın həbsi ilə bağlı qərar qəbul edib. O həmçinin böyük məbləğdə rüşvət almaqda ittiham edilir. Sentyabrın 7-də R. Koçaryanın vəkilləri müdafiə etdikləri şəxsin azadlığa buraxılması ilə bağlı məhkəməyə müraciət ediblər. İrəvan məhkəməsi sabiq prezidenti həbsdə saxlayıb.