BƏƏ və Özbəkistan mədənçilik sektorunun inkişafı üçün memorandum imzalayıb
Birləşmiş Ərəb Əmirlikləri (BƏƏ) ilə Özbəkistan, Özbəkistanın mədənçilik sektorunun inkişafını dəstəkləmək, dayanıqlı artımı təşviq etmək və uzunmüddətli iqtisadi dəyər yaratmaq məqsədilə qarşılıqlı anlaşma memorandumu imzalayıb.
BƏƏ-nin rəsmi agentliyi WAM-ın məlumatına görə, memorandum BƏƏ-nin İnvestisiya naziri Məhəmməd Həsən əs-Suveydi ilə Özbəkistanın Baş nazirinin müavini Cəmşid Xocayev tərəfindən Əbu-Dabidə imzalanıb.
Memorandum axtarış və kəşfiyyat işlərindən tutmuş son istehsal mərhələsinədək mədənçilik dəyər zəncirinin bütün mərhələləri üzrə investisiya fəaliyyətlərini əhatə edir.
Qeyd olunub ki, sənəd hökumət və tənzimləyici qurumlar, dövlətə məxsus investisiya şirkətləri və özəl sektor təşkilatları arasında, sektor üzrə investisiya fondları və ixtisaslaşmış qurumlar vasitəsilə əməkdaşlıq üçün institusional çərçivə yaradır.
Bildirilib ki, BƏƏ-nin Özbəkistandakı investisiyaları 2024-cü ildə təxminən 1,3 milyard dollar təşkil edib, bunun 700 milyon dolları bərpa olunan enerji layihələrinə yönəldilib. Hazırda həyata keçirilən birgə layihələrin ümumi dəyərinin isə 4 milyard dolları keçdiyi qeyd olunub.
